Ég fékk þessa frábæru hugmynd.

Í fréttinni af sölu sendiherrabústaðar í London er talað um gróða sem nemur hátt í milljarð. Svo er keyptur bústaður sem, ásamt viðgerðum kostar litlar 870 milljónir.

Var ekki hægt að draga seglin ögn meira saman?

Í stað þess að púkka upp á embætti sem að mínu mati ætti að leggja niður þá mætti minnka niðurskurðinn hjá heilbrigðisþjónustunni, og í framhaldi af því, svo ég viðri nú gamlar hugmyndir, þá á hiklaust að leggja niður sendiráðin á öllum Norðurlöndum utan kannski það danska og virkja ræðismannsskrifstofur mun meira.

Við lokum öllu heila klabbinu.

Það er hins vegar þetta með "2007" flottræfilsháttinn hjá landanum. Við höfum ekki efni á að halda úti sendiráðum út um allar trissur svo af hverju taka stjórnarliðar sig ekki saman og loka?

Hvað er í vegi?

Það læðist að mér sá ljóti grunur að þarna sé verið að stugga við einhverri "heilagri belju." Þeir eru alltof margir sem eru á ríkisspenanum en hvergi virðist mega skera!

Á sama tíma og niðurskurðarhnífurinn er á fullu þá eru bankarnir að hygla vinum og vandamönnum, afskriftir hér og afskriftir þar.

Átti ekki að koma í veg fyrir kennitöluflakkið eða má kannski ekki hrófla við neinu þar?

Nú berst ríkisstjórnin vonlausri baráttu við að leysa skuldavanda heimilinna og talað er um flatan niðurskurð sem að mínu mati er gjörsamlega út úr kortinu því "þeir ríku verða ríkari og þeir fátæku verða fátækari."

Athyglisvert var það sem kom fram í máli forsætisráðherra fyrir nokkrum dögum þar sem í ljós kom að af þeim ca. 22 þúsundum sem eru í vanskilum í dag, voru liðlega 16 þúsund í vanskilum fyrir hrun.

Ég sé enga ástæðu til að púkka upp á þann mannskap. Nógu kostnaðarsamar verða hjálparaðgerðirnar samt.

Nóg að sinni og þar til næst.

 

 

 

 

900 milljóna gróði af sölu sendiherrabústaðar

Athugasemdir

[Sigurður Þórðarson, 15.10.2010 kl. 21:35]

Auðvitað

[Jónatan Karlsson, 15.10.2010 kl. 21:41]

Ég er algjörlega sammála þér, en ruglið er verra en þig dreymir um, því auk allra óþarfa sendiráðana t.a.m. í nokkrum Afríku löndum, þá ráfa einir átta embættislausir sendiherrar um sali utanríkisráðuneytisins niðri á Rauðarárstíg, auðvitað á fullum launum og hlunnindum. Þess má geta að oftast sjá dönsk sendiráð um að gefa út vegabréfsáritanir til Íslands, jafnvel þó íslenskt sendiráð sé í viðkomandi landi.

[Gunnar Halldórsson (IP-tala skráð) 16.10.2010 kl. 08:32]

Ekki gleyma því að það eru einnig prestar ráfandi í útlöndum á fullum launum hjá okkur(ekki hjá fólkinu sem býr úti, því það borgar væntanlega skatta í því ríki sem það starfar í) - til hvers? Það veit Guð einn.