Svaf einhver á verðinum?

 

Seljendur kvóta fá leyfi til strandveiða!

Margir þeirra sem hafa fengið leyfi til strandveiða eru gamlir eigendur kvóta. Hafa þeir selt kvótann sinn, haldið skipunum, veiðarfærum og öðru og hafa nú fengið leyfi til strandveiða, samkvæmt heimildum Fréttablaðsins. Nokkuð er um það að menn reki jafnvel tvo báta til strandveiða. Einnig eru dæmi þess að menn sem eiga lítinn kvóta hafi veitt veiðiskyldu sína í vor, fengið leyfi til strandveiða og leigi nú út kvótann sinn. Markmið strandveiða var meðal annars að auka nýliðun í greininni.

 

Hvað er eiginlega í gangi?

Eiga kvótagreifarnir að komast upp með allt svínaríið áfram?

Er kannski verið að hygla einhverjum?

Örn Pálsson, framkvæmdastjóri Landssambands smábátaeigenda, segir sambandið hafa fengið nokkrar ábendingar varðandi það að gamlir kvótaeigendur séu á strandveiðum.

„Það er algengast að þeir sem selja frá sér kvóta haldi bátunum og þessir aðilar hafa örugglega farið inn í strandveiðikerfið," segir Örn.

Gott og vel en á ekki að taka á þessu máli eins og öðrum afbrotum?

Í mínum huga er þetta ekkert annað en þjófnaður.

Og  svo leigja greifarnir út kvótann sinn og það örugglega á ansi góðum prís.

Um 400 bátar hafa leyfi til strandveiða þó að skilyrðin séu ströng.

Skrípaleikur !

Friðrik J. Arngrímsson, framkvæmdastjóri Landssambands íslenskra útvegsmanna (LÍÚ), segir sambandið hafa fengið ábendingar vegna þessa. „Ég held að þetta sé í gangi. Þetta var ljóst frá upphafi og eitt af því sem við bentum á varðandi þessar strandveiðar."

Af hverju er þá ekkert gert?

Frumvarpið um strandveiðarnar var að mínu mati hroðvirknislega  unnið, engu líkara en megin áhersla hafi verið að keyra það í gegn með hraði án nokkurs undirbúnings.

Mér kemur helst í hug fiskitroll þar sem annar hver möskvi er ónýtur.

Ekki náðist í Jón Bjarnason sjávarútvegsráðherra vegna málsins.

Skyldi engan undra.

Kallinn er greinilega búinn þeim hæfileika að láta sig hverfa þegar hann á von á óþægilegum spurningum.

Ég held, í fullri hreinskilni og einlægni sagt, að garmurinn hefði átt að halda sig á Hólum, þar er hann best geymdur.

Þar til næst.

Ps. Ég er reiður og þegar ég reiðist þá er ég reiður!