Tekið er stórt upp í sig.

Seint linnir látunum.

Nú lætur Framsóknarmaddaman Eygló Harðardóttir gamminn geysa og upplýsir okkur fávísan almúgann um þá ógn sem að okkur steðjar, verði farið út í fyrningu aflaheimilda, sem svo muni leiða til gjaldþrots Landsbankans.

Áfram er haldið.

Nú er okkur tjáð að áðurnefndur banki sé með um 50% af öllum skuldum sjávarútvegsins og fyrning aflaheimilda kæmi til með að hafa mikil áhrif á þau veð sem bankinn hefur fyrir þessum skuldum.

Það liggur í augum uppi að daman hefur ekki unnið heimaverkefnin sín.

Þau veð sem Landsbankinn hefur, hafa ekkert með aflaheimildir að gera því bankinn hefur aðeins tekið veð í fiskiskipunum en ekki aflaheimildum.

Í lögum um fiskveiðistjórnun segir:

1. gr. Nytjastofnar á Íslandsmiðum eru sameign íslensku þjóðarinnar. Markmið laga þessara er að stuðla að verndun og hagkvæmri nýtingu þeirra og tryggja með því trausta atvinnu og byggð í landinu. Úthlutun veiðiheimilda samkvæmt lögum þessum myndar ekki eignarrétt eða óafturkallanlegt forræði einstakra aðila yfir veiðiheimildum".

Það segir sig sjálft að ekki er hægt að veðsetja eign annarra.

Aflaheimildirnar halda áfram að vera til og verða settar í nýtingu jafnóðum og þær losna til leigu. Þeim verður ekki stungið undir koddann.

Ein stærsta breytingin verður að öllum líkindum sú að komið verður í veg fyrir áframhaldandi kvótabrask sem sett hefur skammarblett á íslenska útgerð. Vonandi fer það ekki fyrir brjóstið á Framsóknarmönnum. 

Svona rétt í lokin væri fróðlegt að fá að vita hver raunveruleg skuldastaða sjávarútvegsins er því í fréttinni er talan 400 milljarðar nefnd en talan 800 milljarðar hefur einnig heyrst.

Þar til næst.                        

 

 

 

 

 

 

 

 

 

 

 

 

Fyrning setur fjárhag Landsbankans í voða

Athugasemdir

[lydur arnason (IP-tala skráð) 21.10.2009 kl. 00:46]

Sæll, Þráinn Jökull.   Áður mátti ekki hrófla við kvótakerfinu vegna þess að þá færi útgerðin á hliðina, nú má ekki hrófla við kvótakerfinu vegna þess að þá fara bankarnir á hliðina.  Og nú, loks þegar engin hindrun pólitískt séð er fyrir breytingum, þora menn engu.   Er nema von að margir vilja setja þetta allt í hendurnar á útlendingum.  LÁ

[Jenný Stefanía Jensdóttir, 21.10.2009 kl. 02:35]

Góður pistill.  Halda þessu liði við efnið. 

Við erum engir gullfiskar.