Gleðileg jól.

Kæru vinir nær og fjær. Ég óska ykkur öllum gleðilegra jóla,Til mínar föroysku vinir segi eg eisini gleðileg jól.

Af skötuveislu og fleira.

Það er komið að því aftur.

Skötuveislan er á fullu og skatan frá í fyrra er alveg stórkostleg.

Ég finn ekkert fyrir einsemdinni hér í sumarbústaðnum þegar ég er að gadda í mig skötuna, með hamsatólg og öllu tilheyrandi.

Kannski smá harkalegt af nágrönnunum að heimta að ég æti skötuna út í sveit...sem sýnir mér að sumt fólk kann ekki gott að meta.

Ég vil reyndar koma því á framfæri að fólksflóttinn úr sveitunum er er hvorki mér eða skötunni að kenna.

Á meðan ég var að stappa í mig dásemdinni bárust mér þvílíkt stórkostlegar fréttir að við lá ég yrði kjaftstopp.

Það á að leiðrétta laun okkar háttvirtra.

Við þurfum sem sagt ekki að óttast ótímabær dauðsföll okkar háttvirtra, sem sumir hverjir hafa , samkvæmt orðum efnahagsráðgjafa hrunstjórnarinnar, orðið að borga með sér.

Í onálag á víst að taka til endurskoðunar lífeyrisréttindi liðsins, sem sýnir mér að réttlæti fyrirfinnst hér enn.

Það væri ótækt að ætlast til að fólk sem hefur fórnað sér í þágu hins norræna velferðarsamfélags þurfi svo að draga fram lífið á einhverjum skíta lífeyri.

Nú er komið að háttatíma hjá þeim gamla.

Blessi ykkur öll og góða nótt.

Senn líður að jólum.

Þegar litið er til baka er sosum ekki mikið sem stendur upp úr.

Fyrir utan hvert skattlagningarklúðrið á fætur öðru.

Það rifjast upp fyrir mér mörg orð sem viðhöfð voru þegar núverandi stjórn tók við. Orð sem reyndust jafn innantóm og" kötturinn í tunnunni."

Allt er á uppleið, samkæmt væntingum AGS. Að vísu gleymist eitt smáatriði en það er almúgi þessa lands sem nú hefur orðið að axla byrðar manna sem fóru fram úr sér og þáðu ofur-laun (sjálfskömmtuð?) sökum þeirrar ofur-ábyrgðar sem þeir þurftu að axla á mis-sterkum herðum.

Skjótt skipast veður í vindi og nú , í stað þess að beita allri orku og ráðast að rótum vandans, þ.e. að byggja upp mannvænlegt samfélag, var ákveðið að setja á svið skrípaleik, fólginn í því að finna sökudólg.

Fjórum var stillt upp við vegg, einn fannst. Það þarf varla að taka fram að stjórnarliðar sýknuðu sína en ákváðu að hengja andstæðinginn.

Skrípaleikur frá upphafi til enda.

Annað hvort allir eða enginn.

Eitt af mýmörgum dæmum sem sýna okkur þóknunarlund hundsins í garð húsbóndans.

Ég er einn af þeim sem kaus til vinstri í þeirri von að nú myndi létta til því kosningaloforð sem : "Allt upp á yfirborðið, gagnsæi, hverjum steini skal velt við " og áframhaldandi...dundu á okkur hvern dag. 

Vel væri ef staðið hefði verið við stóru orðin.

Mér eru minnisstæð orð bráðum fyrrverandi forsætisráðherra okkar er hún lýsti því yfir að ekki yrði hróflað við kjörum aldraðra og öryrkja.

Þann 1. jan. sl. var lífeyrir okkar frystur.

Ég minnist líka orða háttvirts þáverandi félagsmálaráðherra (stuttráðnum) er hann lýsti því yfir að samræmdir yrðu tekjumöguleikar aldraðra og öryrkja.

Ég bíð enn eftir efndunum.

Ég er vonsvikinn. Ég er líka orðinn bálvondur því ég hef verið hafður að fífli.

Ég er ekki sáttur við slíkt.

Enda kem ég til með að ráða fram úr slíku. Án gylliboða og falsloforða.

Það sem ég hræðist þó er að endurnýjun innan 4-flokkanna er lítil sem engin.

Enn og aftur þenur háttvirtur efnahagsráðgjafi hrunstjórnarinnar kjaft og , burtséð frá öllu öðru, grenjar yfir lágum launum (efrimillistéttarelítan...) og , er að því mér virðist, kominn með styrkþegann Guðlaug Þór í taum. Sem kemur sosum ekki á óvart. Eftir höfðinu dansa......

Hvað er til ráða ??

Nýtt stjórnmálaafl ??

Góð hugmynd sem gæti lukkast ef ekki væri fyrir þá áráttu Íslendinga að vilja vera efstir. Burtséð frá hæfileikum og öðrum góðum eiginleikum.

Útlitið er ekki gott en ég ætla ,svona rétt í lokin, að kveðja með mynd sem erfinginn (eins og það verði nokkuð að erfa) var að senda mér.

Blessi ykkur öll og með vonandi tíð ...

 

 

 

 

 

 

 

Hverjum skal trúa nú ??

Nú ber Gylfi vinur okkar Magnússon til baka þær fréttir að hann hafi hækkað laun stjórnarmanna í Fjármálaeftirlitinu og kennir um illum tungum. 

Sem kemur mér reyndar ekki á óvart.

Það er svo íslenskt. Þ.e. þetta með rógburðinn.

Ég gleypti við fréttinni enda gat ég ekki annað. Ég las hana í einu "virtasta" dagblaði landsins...Morgunblaðinu.

Sem sýnir mér að svo bregðast krosstré sem önnur tré.

Ég bið Gylfa Magnússon innilega afsökunar hafi ég haft hann fyrir rangri sök, en, nú að öðru því af nógu er að taka.

Nú er allt í hálofti innan ríkisstjórnarinnar vegna væntanlegra "kaupa" Kínverjans á eyðilendinu þarna einhversstaðar upp á hálendinu og sýnist sitt hverjum. Ekki treysti ég mér til að leggja dóm á það sem þar að gerast en bendi þó á að þar sem við Íslendingar horfum fram til morgundagsins...sumir hverjir...þá horfa Kínverjar fimmtíu til eitt hundrað ár fram í tímann.

Sem er sosum í lagi mín vegna því þá verð ég löngu dauður.

Svo kemur hér áhugaverð klausa :

"Fjármál Álftaness eru í ólestri eftir óstjórnina 2006 - 2009 en með framlagi frá ríkinu og afskriftum lánardrottna......" sem sagt allt í kolarúst en enginn hefur verið látinn svara til saka fyrir óráðsíuna og fjármálafylleríið.

Mér leikur hugur á að vita hvað veldur því.

Breiðavíkurdrengurinn Lalli Jones var gripinn með skinkubréf í vasanum sem hann hafði gleymt að borga, maðurinn var jú bara svangur, og uppskar þar með frítt fæði og húsnæði, en þeir sem bruðla með almenningsfé ?? Skulu þeir ekki borga ??

Svona rétt í lokin kemur hér tilvitnun í smá frétt frá háttvirtu Alþingi sem rennir stoðum undir þann grun minn að ekki sé allt í lagi á þeim bænum.

Um er að ræða orð háttvirts efnahags- og viðskiptaráðherra okkar, háttvirts Árna Páls Árnasonar þar sem hann gagnrýnir fjármálaeftirlitið fyrir að afgreiða ekki kostnaðarmat á frumvarpi um eftirlitsgjald sem rennur til Fjármálaeftirlitisins.

O, jæja þetta er fólkið sem þjóðin kaus yfir sig en mikið yrði nú ánægjulegt að fá einhverjar jákvæðar fréttir. Rétt si svona til að lyfta upp huganum. Nóg er komið af því neikvæða.

Blessi ykkur og þar til næst.

 

 

 

 

Nei takk. Nú er nóg komið.

Eru háttvirtir stjórnarliðar okkar gjörsamlega gengnir af göflunum ??

Augljóslega  hefur fram hjá þeim að hér ríkir kreppa.

Í það minnsta hjá þeim sem minnst mega sín.

Megi sá algóði vernda okkur og hvað hin varðar þá skulum við bara

láta þau eiga sig.

 

Hækkaði stjórnarlaun um 77%

Hættulegt Árni Páll ??

Ég hef hingað til ekki haft neina ofurtrú á gáfnafari háttvirts viðskiptaráðherra okkar en nú tekur út yfir allan þjófabálk.

Nú skal selja.

Og dýrt skal það vera.

Finnst ykkur góða fólk ekkert athugavert við tilboð Kínverjans að kaupa 300 ferkílómetra fyrir einn milljarð króna ?? Án vatnsréttinda ?? 

Það skýtur skökku við að maður sem kemur úr kommúnistaríkinu Kína, þar sem allir skulu vera jafnir, skuli hafa yfir allt að því ótakmörkuðum fjármunum að ráða.

Í framhaldi af því kemur mér í huga sagan "Animal farm." Allir eru jafnir, en...sumir eru jafnari en aðrir. Fyrir ekki svo löngu síðan las ég mjög greinargott viðtal við Pétur, hótelstjórann í Reynihlíð í Mývatnssveit þar sem hann lýsti yfir áhyggjum sínum varðandi væntanlega "loftkastalabyggingu" þarna upp á öræfum. Of langt mál yrði að tíunda allt sem þar kom fram, það getur hver sem er fundið það á netinu, en ég get með sanni tekið undir hvert einasta orð.

Það er löngu vitað mál að takist Kínverjum að troða stórutánni inn þá fylgir þeim ótakmarkaður fjöldi fólks, spilling og sviðin slóð.

Samanber Ítalía .

Það hlýtur hver sæmilega þenkjandi maður að átta sig á svikamyllunni sem að baki býr þvílíku kauptilboði.

Nema þá helst háttvirtur viðskiptaráðherra vor sem reyndar hefur lýst því yfir að hann sé ómögulegur í stærðfræði.

Að ógleymdum þeim sem ekki sjá nekt keisarans fyrir græðgisglampanum í eigin glyrnum.

Sem leiðir hugann að því sem að baki kynni að búa.

Nú vil ég ekki ganga svo langt að ætla löndum mínum að þeir séu komnir á mála hjá Kínverjum en samt sem áður læðast að mér margar sóða hugsanir.

Von mín er sú að innaríkisráðherra taki ekkert tillit til þeirra sem græðginnar vegna sjá ekki að þeir kasta krónunni í von um skjótan og auðfenginn auragróða.

Blessi ykkur öll og þar til næst.

 

 

Hættulegt að lokast frá umheiminum

Úrsögn úr Nató...andstaða við aðild að ESB...

...En, hvað með Schengen Steingrímur ??

Ályktun um utanríkismál samþykkt

Margt undarlegt gerist enn.

Þann 18. ág. 2009 bárust oss til eyrna þau tíðindi að stofnuð hefði verið "Bankasýsla ríkisins", sem hafði því hlutverki að gegna, svo vitnað sé í lögin varðandi áðurnefnda stofnun, að leggja áherslu á endurreisn og uppbyggingu öflugs innlends fjármálamarkaðar, o.sv.frv.

Þess má geta að áðurnefnd stofnun var sett á laggirnar að frumkvæði fjármálaráðherra.

Nú ber hins vegar svo til að þegar framsóknarmaðurinn Páll Magnússon var ráðinn forstjóri bankasýslunnar, þrátt fyri að hafa lent í sjöunda sæti hvað varðar hæfni og menntun til starfsins, þá ber fjármálaráðherra sér á brjóst og kveðst ekki hafa heimild til að grípa inn í.

Samkvæmt þessu er Páll kominn á spenann og allt er gúddí gúddí.

Þó svo 90% þjóðarinnar hafi lýst andstöðu sinni gegn þessari ráðningu. Samkvæmt vina og vandamannapólitíkinni verður ekki hlustað á þann hóp.

Svo, að endingu, þá rak ég augun í smá fréttaklausu sem fangaði athygli mína en hún fjallar um ríkislögreglustjóra , sem þrátt fyrir bruðl upp á 90 millur, situr sem fastast.

Var nokkur að tala um vanmátt og aumingjaskap innanríkisráðherra ??

Nóg að sinni og þar til næst.

Stundum velti ég fyrir mér tilganginum með lífinu og tilverunni......

...hvort hann sé virkilega sá að við eymingjarnir hafi virkilega fæðst inn í hið mannlega (?) samfélag til þess eins að þjóna fámennum, útvöldum hópi fólks sem helst virðist hafa sér til dundurs að féfletta gamlar konur og börn.

Að ógleymdum okkur öllum hinum.

Daglega dynur á okkur óþverrinn. Sama hvert er litið. Mörg eru dæmin en ég læt mér nægja að stikla á stóru.

" Samkvæmt nýútkomnu fjárlagafrumvarpi er ekki gert ráð fyrir að ellilífeyrir, örorkubætur og atvinnuleysisbætur hækki í samræmi við lægstu laun, eins og lofað var í tengslum við gerð kjarasamninganna."

Merkilegt nokk...en þetta kemur mér ekki á óvart.

Svo er það vina og vandamannapólitíkin.

Nýverið var Páll nokkur Magnússon, guðfræðingur að mennt, ráðinn forstjóri Bankasýslu ríkisins sem hefur það meginhlutverk að hafa umsjón með bönkum í eigu ríkisins, án pólitískra tengsla.

Páll var ráðinn þrátt fyrir að hafa verið fulltrúi Framsóknarflokksins í áraraðir.

Af þeim sjö sem sóttu um þóttu sex manns hæfari en áðurnefndur Páll. Stjórnarformaður Bankasýslunnar, Þorsteinn Þorsteinsson telur Páli til tekna að hafa verið aðstoðarmaður viðskiptaráðherra, bæði Finns Ingólfssonar og Valgerðar Sverrisdóttur,meðal annars þegar bankarnir voru einkavæddir.

Það er skítalykt af þessu öllu. Þarna er litið framhjá vanhæfi en í stað þess virðist guðfræðingurinn hafa verið ráðinn af umburðarlyndi og klíkuræði sem reyndar er hluti af íslenskri hefð. Að hafa verið aðstoðarmaður Valgerðar Sverrisdóttur sem, hefði hún fengið að ráða, væri búin að kaffæra Austurlandið og jafnvel hluta af Norðurlandinu undir virkjanir, er nokkuð sem hver sæmilega þenkjandi maður hefði vit á að þegja yfir. Um Finn Ingólfsson er best að hafa sem fæst orð.

Kannski...þrátt fyrir allt...fer best á því að halda guðfræðingnum í starfinu. Tengslin við almættið gætu jafnvel komið okkur til góða. Það verður samt áhugavert að fylgjast með framhaldinu. Sérstaklega í ljósi þess að fjármálaráðherra hefur krafið stjórnarformann Bankasýslunnar skýringar.

Nú hefur ríkisstjórnin, af sínu alkunna örlæti, ákveðið að færa Háskóla Íslands einn og hálfan milljarð að gjöf næstu þrjú árin sem er góðra gjalda vert. Þó svo hjálparstofnanir hafi orðið að skera niður matargjafir sökum fjárskorts. Þó svo enn sé ráðist að öldruðum og öryrkjum með auknum skattaálögum. Þó svo landsflóttinn aukist. Þó svo gleymst hafi að gera ráð fyrir áðurnefndri gjöf á fjárlögum.

Enn hitnar undir ra...... á háttvirtum biskupi okkar, Karli Sigurbjörnssyni og ekki að ástæðulausu. Ég ætla ekki að hafa mörg orð um þetta dapurlega mál en vil þó benda á að víða erlendis er venjan sú að komi upp mál sem vekja úlfúð í samfélaginu stígur viðkomandi til hliðar. Karl yrði maður að meiri, gerði hann slíkt hið sama.

Blessi ykkur öll og þar til næst.

 

 

 

 

 

 

 

 

 

 

 

 

 

 

 

 

 

 

 

Hvað varð af skjaldborg heimilanna Jóhanna ??

Af hverju er ráðist að okkur öldruðum og öryrkjum einu sinni enn Steingrímur ??

Hverjum gagnast aðgerðir ríkisstjórnarinnar öðrum en eigendum vogunarsjóða, sem rokka feitt fyrir 65 milljarða hagnað af bankarekstrinum ??

Ég, sem öryrki, hef reynt að halda í horfinu en nú er svo komið að ef ég get ekki selt húskrílið, þá missi ég það.

Til eigenda einhverra erlendra vogunarsjóða sem, ef það skyldi hafa farið fram hjá háttvirtum stjórnarliðum, reyndar eiga íslensku bankana.

Ég er þó betur settur en margur annar því þegar ég gefst endanlega upp á "norræna velferðarsamfélaginu" þá verður mér tekið opnum örmum í Færeyjum, þar sem ég bjó á annan áratug.

Í versta falli hirðir bankinn húsið og ég pilla mig af stað.

Þó fyrr hefði verið.

Með þessum hugleiðingum mínum býð ég ykkur öllum góða nótt og þar til næst.