...af erlendu bergi brotnir...

Þýðir þetta að ég, "útlendingslegi karakterinn;" sé laus allra mála?

Ég vona það svo sannarlega því það er jú farið að grynnka á fóðrinu í kæliskápnum og maður verður að fara út á milli fólks til að kaupa í sarpinn.

Þar til næst.

Hraðbankaþjófar handteknir

Það skyldi þó aldrei vera...

...að þeir hafi bara ákveðið að yfirgefa skerið?

Það er ekkert einsdæmi og þá sérstaklega í ljósi efnahagsástandsins hérlendis.

Menn hafa verið dæmdir í farbann hér -sem að mínu mati er álíka gáfulegt og að biðja fjandans minkinn að hinkra meðan ég næ í hólkarann til að skjóta hann.

En sjálfsbjargarviðleitnin lætur ekki að sér hæða.

Menn bíða ekki.

Hvað varðar lýsinguna frá lögreglunni, þ.e. "útlendingslegir" á að líta, ja, þá hef ég ákveðið að hafa hægt um mig á næstunni.

Ég er nebbnilega í "áhættuhópnum", þ.e. ég er dökkur ( MJÖG dökkur! ) á brún og brá þannig að ég er sem sagt, samkv. upplýsingum frá lögreglu, "útlendingslegur" á að líta.

Hvers á ég að gjalda?

Þar til næst.

 

Þriggja þjófa enn leitað

Hvað næst?

Ég er í þessu að hlusta á viðtal Bubba Mortens við Jóhannes í Bónus, endursent að vísu, verð að viðurkenna að mér finnst nú ákaflega fátt um svör.

Loðin og tvíræð.

Inntur eftir snekkju og íbúðarkaupum sonarins er farið að tala um leigutekjur ( af snekkjunni ) o.sv.frv.

Davíð Oddsson er sökudólgurinn í augum Jóhannesar og svona gengur allt viðtalið.

Mörgum spurningum er ósvarað, t.d. Hvaðan komu aurarnir upphaflega til að fjármagna kaup sonarins á íbúðinni á Manhattan, 3,5 milljarðar? 

Og hvað kostaði snekkjan?

Það er eitt og annað sem mér leikur hugur á að fá að vita. En svörin fást ekki.

Þar til næst.                                                      

 

 

 

 

MISTÖK ???

Fráfarandi sendiherra Bandaríkjanna tilkynnt á leiðinni á Bessastaði að hún fengi ekki fálkaorðuna.

Varla bætir þetta ímynd Íslands út á við.

Það læðist að mér sú hugsun að nú þyrftu einhverjir starfsmenn forsetaembættisembættisins að

a: fara í endurmenntun, b: fá sér aðra vinnu.

Bandaríkjamenn líta svona hátterni ekki hýru auga.

Nóg er nú komið af skömminni og handvömminni!

Þar til næst.

Heimildir Vísir, kl.20.23

 

Gjaldþrot á gjaldþrot ofan.

Er ekki hægt að sækja þessa 7,7 milljarða í vasa Ólafs bónda ríka á Miðhrauni?

Eða á skrípaleikurinn að halda áfram?

Þar til næst.

Egla óskar eftir nauðasamningum

Kosningar og póstkassarusl.

Það er einstaklega ánægjulegt að fá ókeypis pappír til að tendra í kamínunni og sumt af því meira að segja í lit.

Ég er ákaflega þakklátur fyrir það.

Það verður þó að segjast eins og er að jafn forvitinn og ég er þá má ég til að kíkja ögn á myndirnar áður en þær hverfa í hinum eilífu eldum jafnvel þó þetta sé að mestu sama tjaran.

Ég hjó eftir einu, hann Guðmundur Steingrímsson okkar með frumburðinn i fanginu.

Svo hugljúft ,svo fallegt.

En hver trúir því að maður sem siglir óðfluga í áttina að miðjum aldri haldi á frumburðinum?

Ég meina, hvað var drengurinn að gera öll skólaárin?

Lagði hann kannski ( einsmanns ) kapal?

Það læðast að mér margar hugsanir.

Var ekki strákurinn í Samfylkingunni til skamms tíma?

Ég er frekar lítið fyrir svona flokkaflakk ,hver sem svo tilgangurinn kann að vera.

Þar til næst.

 

Stórfyrirtæki styrktu prófkjörsframbjóðendur um milljónir króna.

Stórfyrirtæki á borð við Baug og FL Group styrktu frambjóðendur í prófkjörum stjórnmálaflokkanna árið 2006 um milljónir króna, samkvæmt heimildum fréttastofu. Einstakir frambjóðendur þáðu allt að tvær milljónir í styrk. Helmingur þingmanna hefur ekki vilja gefa upplýsingar um fjármögnun prófkjörsbaráttunnar fyrir síðustu þingkosningar.

Þegar allt lék í lyndi árið 2006 segja heimildamenn fréttastofu að bankar og fjármálafyrirtæki hafi verið mjög viljug að leggja stjórnmálaflokkum og einstaka stjórnmálamönnum lið.

Það ár styrktu stórfyrirtæki á borð við Baug og FL Group frambjóðendur í prófkjörum stjórnmálaflokkanna um milljónir samkvæmt heimildum fréttastofu, en lög voru sett um hámark framlaga í ársbyrjun 2007. Hermt er að hæstu styrkir frá þessum félögum, sem runnu til einstakra prófkjörsþátttakenda, hafi numið tveimur milljónum króna.

Heimildir fréttastofu herma að sjálfstæðisþingmennirnir Guðlaugur Þór Þórðarson, Illugi Gunnarsson og Guðfinna Bjarnadóttir, samfylkingarfólkið Helgi Hjörvar og Steinunn Valdís Óskarsdóttir, og framsóknarmaðurinn fyrrverandi, Björn Ingi Hrafnsson hægt að segja, séu á meðal þeirra sem hlutu styrk frá áðurnefndum fyrirtækjum. Enginn hefur þó viljað staðfesta að hafa þegið slíkan styrk, en taka skal fram að ekki náðist í Helga Hjörvar við vinnslu fréttarinnar. Þá hefur Guðlaugur Þór dögum saman hunsað ítrekuð skilaboð fréttamanns.

Ég er gjörsamlega orðlaus.

Það gerist ekki oft, en hvað er hægt að segja?

Væri ekki nærtækast fyrir t.d.  Guðlaug Þór að leggja spilin á borðið og standa þá eftir með hreinan skjöld?

Það er ef hann hefur hreinan skjöld.

Þar til næst.

Málæði?

Er ekki kominn tími til að gamli maðurinn setjist í helgan stein og riti endurminningar sínar?

Af nógu er örugglega að taka.

Þar til næst.

Stefnir í næturfund

Allt komið fram?

Úr því að fyrrverandi formaður flokksins hefur stigið  fram og axlað ábyrgð á því að hafa veitt styrkjunum viðtöku, af hverju var þá þessi feluleikur fyrstu dagana eftir að upplýsingarnar römbuðu inn á borð fjölmiðlana?

Voru menn kannski að leita sér að blóraböggli eða jafnvel að búa til einhverja þriðja flokks skáldsögu ( sem enginn trúir ) til að klóra yfir úrganginn úr sér?

Þið Sjálfstæðismenn hafið glatað trausti þjóðarinnar og það skiptir engu hversu kokhraustir þið reynið að vera, það líður á löngu þar til þið öðlist það að nýju.

Atkvæðinu mínu hafið þið tapað fyrir lífstíð.

Þar til næst.

Allt komið fram sem máli skiptir

Maður er manns megin.

Halda þessir menn virkilega að við kjósendur séum þvílik fífl að gleypa við þessu?

"Ýmsir aðilar hafa reynt að gera þessa atburðarás tortryggilega. Við hörmum það. Við vorum einungis að leggja Sjálfstæðisflokknum lið í miklum fjárhagserfiðleikum og lögðum okkur alla fram í þeim tilgangi. "

Svo mörg voru þau orð hjá Steina í "Kók" og Steinþóri Gunnarssyni.

Þvílík tjara.

Af hverju komu þessir menn ekki STRAX fram á sjónarsviðið og lýstu fullri ábyrgð á hendur sér?

Það getur hver meðalgreindur grunnskólanemi reiknað út hversu gífurleg og neikvæð áhrif þessar ofurstyrksumræður hafa haft í för með sér.

Var kannski verið að plotta?

Á kannski að gera lokatilraunina, og það reyndar óttalega vanburðuga, til að draga okkur kjósendur á asnaeyrunum einu sinni enn?

Ég hef ekki trú á að nokkur maður sé virkilega svo skyni skroppinn að sjá ekki í gegnum farsann.

Þar til næst.