Kaupþing?

Magnús Orri!  Kaupþingsmenn eru löngu búnir að skíta á sig, rétt eins og allir aðrir.

Þar fyrir utan, hefurðu kynnt þér laun allra nýju bankastjóranna ?

Bankastjórar Nýja Glitnis og Landsbankans neita að gefa upp laun sín og þetta eru ríkisstarfsmenn!

Nýráðinn bankastjóri Nýja Kaupþings er ráðinn upp á litlar 1,950,000, á mán.Stjórnarformanni Nýja Kaupþings-Ólafi Hjálmarssyni- finnst þetta bara vera í fínasta lagi, á þeim forsendum að það sé erfitt að fá menn í svo krefjandi starf við svo erfiðar aðstæður!

Gott og vel, en ef það svo erfitt að fá menn í svo krefjandi..blablabla, þá er bara að auglýsa og þá geta viðkvæmar sálir sem ekki treysta sér í svo krefjandi ...blabla, haldið sig heima og skráð sig atvinnulausar. M,er skilst að atvinnuleysisbætur séu 110 þús. á mán.

Þar til næst.

MISTÖK???

"Glitnir viðurkennir mistök gagnvart Norðmönnum."

Kerfisleg mistök?

Uppgreiðsluskilyrði vitlaust skráð??

Kann þetta bankafólk ekki til verka???

Þar til næst.

Síðasta hálmstráið.

Á nú IMF að redda öllu?

Þar til næst.

Gapastokkar o.fl.næs.

Eftir mikið japl og jaml og fuður komst ykkar hæstvirtur ( ásamt samnemendum ) að þeirri niðurstöðu -og þá sérstaklega í ljósi greinargerðar frá litla bró í Danaveldi - að sennilega yrðu höggstokkar alltof dýrir í rekstri, svo ekki sé minnst á þrifin sem ekki einu sinni atvinnuleysingjar vilja líta við.

Nei takk.

Hins vegar kom einn samnemandi með áhugaverða hugmynd, þ.e. "Gapastokkar", tiltölulega einfaldir í smíðum ( eru ekki kenndar smíðar í öllum grunnskólum í dag? ) og ódýrir í framleiðslu, sérstaklega ef hægt yrði að stela spýtu hér og þar.                                                       Hafi ég lesið söguna rétt þá hvíldu forfeður vorir oft lúnar lappir í áðurnefndum gapastokk og þá sérstaklega eftir (nætur)langan og erfiðan vinnudag. EN, hugmyndafræðin er í fullum gangi og nú er rætt um markaðssetningu og þá að sjálfsögðu erlendis því það ku jú vanta gjaldeyri inn í landið og það eru ekki allir svo lánssamir að hafa aðsetur á t.d. Cayman Islands ,og verða þar af leiðandi að dúsa heima í sumar- já og jafnvel vetrarfríinu líka, eða þá að taka upp gamla og góða siði og kaupa gjaldeyrinn á svörtu- borgist með "Bacalao"!                                   Sá róttækasti í hópnum kom með þá hugmynd að selja vendi svo fyrrv. viðskipta"vinir" íslenskra banka t.d. Bretar eða Finnar eða Danir eða.... ja ansi margir Evrópubúar, fengju smá "útrás" við að dangla í kjötmikinn og þriflegan bakhluta einhvers "útrásarmannsins", en svo er komið upp smá vandamál. 

Úr hverju á vöndurinn að vera?                                                                                         

Ég lagðist eindregið gegn rafmagnsvírum, þeir geta leitt út og ef það leiðir út þá getur slegið út og ef það slær út þá erum við í slæmum málum. Og hver á svo að borga Rarik, og Orkusölunni ,og greiðsluseðilinn frá einum af ríkisbönkunum?

Ég mæli hinsvegar eindregið með gaddavír, og af hverju? Jú, við eigum nóg af honum. Það þarf ekki annað en að keyra héðan og til Rvk. og þá blasa við manni hankir og jafnvel hrúgur af yndislega ryðguðum gaddavír og ekki nóg með það, spýtnabrakið sem svo oft virðist vera fylgifiskur vírsins er alveg tilvalinn efniviður í áðurnefndan gapastokk.

Ég vil samt, áður en lengra er haldið, ítreka það aftur og enn að við, þ.e.ég og áðurnefndur róttæklingur og vandahönnuður erum allsendis óskyldir, svo langt sem ég veit, en eins og alþjóð er  kunnugt hafa Eyrsveitungar og Helgfellingar aldrei verið þekktir fyrir að vaða yfir lækinn eftir vatninu.

Nóg um það.

Og enn bætist í sarpinn. Nú er Sparisjóðabankinn í mjööög vondum málum ( 9.oo fréttirnar ), þessu ætlar seint að linna. Er ekki bara kominn tími til að pakka náttfötunum og pilla sig aftur yfir til nágrannalandsins??

Hmmm, og þó.

Þar til næst.

 

 

 

 

Blóðbað á Lækjartorgi?

Það er nú einu sinni svo að þegar ég horfi á Kastljós þá finn ég fyrir vanmætti mínum. Til að mynda í kvöld þegar ég hlustaði á einn af okkar mörgu ofurlaunamönnum leita sér að sökudólg og kenna öllum um nema sér sjálfum.

Skyldi þessi vesalings maður hafa þurft að ganga heim eða gat hann kannski sníkt sér í strætó?

Í framhaldi af því dettur mér í hug sú ágæta aðferð sem vinir okkar Frakkar höfðu þegar þeir fundu upp höggstokkinn. Hönnunin var í einu orði sagt alveg frábær, svo ekki sé minnst á árangurinn og afköstin.Ég sé fyrir mér tvo eða kannski þrjá höggstokka á Lækjartorgi ( Maður verður að fara soldið pent í það ), og svo væri hægt að auglýsa : Blóðbað á Lækjartorgi kl. fimm í dag, aðgangur ókeypis, bannað innan sextán, og þó, eftir á að hyggja,sennilega væri réttast að rukka inn aðgangseyri, það myndi kannski hjálpa ögn upp á skömmina sem þessir fjárglæframenn hafa skilið eftir sig.

Svona er nú það.

Hér er reyndar allt við það sama , nemendur Fsn. halda áfram að velta fyrir sér allskyns aftöku hugmyndum en það verður bara að koma í ljós hver hugmyndin verður ofan á. Margar góðar eru í gangi.

Þar til næst.

Leti? Launahækkanir o.fl.

Ég vil að það komi skýrt og greinilega fram að það er alls ekki leti sem veldur því að ég hef ekki bloggað í tæpan mánuð. Ég hef bara verið einstaklega upptekinn því þegar menn á mínum aldri setjast á skólabekk þá er fyrsta verkefnið að læra hvernig á að læra. Mér kemur í hug fyrsta árið í barnaskólanum þegar ég var að rembast við " Litlu gulu hænuna ". Skilur nokkur hvað ég er að fara? Ég held ég skilji það varla sjálfur.

En nú að alvöru lífsins. Ég ku vera einstaklega dagfarsprúður og rólegur að eðlisfari, kippi mér ekki upp við neitt nema kannski hressilegan jarðskjálfta en nú get ég ekki lengur orða bundist. Ég var að hlusta á kvöldfréttirnar en því miður missti ég af hluta en þó hjó ég eftir launahækkunum þar á meðal þingmanna sem nú hafa 562 þús. í mánaðarlaun. Eru svo ekki einhverjir bitlingar að auki?

Spyr sá sem ekki veit.

Væri nú ekki tilvalið á þessum síðustu og verstu tímum að spara ögn? Bara ögn??

Við öryrkjar fengum hækkun úr 137 þús. í 150 þús.( Þökk sé Jóh. Sigurðard.), mínus skatt. Þegar minnst er á skattahítina kemur mér í hug sálin prestanna. Framfærslukostnaður einstaklings ku vera um 80 þús. á mán. Ofan á koma svo afb. af húsnæði o.sv.frv. Hvað sem því líður þá "Þökkum vér hundar þau bein sem til okkar er hent."

Nóg um það.

Hér hefur verið alveg geysi hress og frískandi veðrátta, sunnan grenjandi rok og rigning sem er alveg frábær tilbreyting frá norðaustanáttinni, fátt geri ég skemmtilegra en að fá mér göngutúr í svona hressilegu veðri.

Þar til næst.

Sumri hallar hausta fer

   Sumarið kom-og fór. Einstaklega hlýtt og notalegt á meðan var, byrjaði kannski nokkuð seint en svo skall það á. Nú grassera gróðrarskúrirnar á fullu og það svo hressilega að lóðin mín sem var slegin fyrir viku er orðin fagurgræn, varla að sjáist í mosann lengur. Nágranni minn kom með þá ágætis hugmynd ( að hans mati ) að skella bara trippunum sínum á beit og þá þyrfti ég ekki að hafa áhyggjur af sinu og mosa að vori....

   Ég held nú samt að ég helli mér út í garðyrkjuna þegar þar að kemur.

   Nú er skólastarfsemin komin í "full swing", fyrsti skóladagurinn liðinn, lét mig hafa það að arka út í skólann í hressandi ( lesist grenjandi ) rigningu ( þetta er nú ósköp stutt ) til að fá kennslu áætlun ásamt verkefnum sem skilast skulu á mánudag! Mér varð hugsað til fyrsta enskukennarans míns sem hélt því blákalt fram að það væri enginn munur á bandarískri og breskri ensku. Það var einmitt þá sem ég hætti og fór í fjarnám.  Nú er ég hins vegar svo lánsamur að hafa fengið enskan kennara og hún kann sitt fag, tekur tillit til fólks með mismunandi bakgrunn en leggur líka áherslu á að viðkomandi öðlist sem víðtækasta þekkingu á ekki bara tungumálinu sem slíku heldur líka bókmenntum enskumælandi rithöfunda og " Þá skiptir engu máli hvaðan þeir koma". Fyrsta bókin sem við lesum þessa önnina er skrifuð af nígerískum höfundi! Þetta leggst bara vel í mig, ég fæ að nota það sem ég hef lært og nú bæti ég bara við mig.

   Nú er aðeins að stytta upp svo ég ætla að skjótast út á milli skúra og stinga girðingarstaurunum inn í bílskúrinn hjá nágrannanum ( já þeir standa enn upp við bílskúrsvegginn ), hmm, gott að eiga góða granna.

   Jamm, nú er bara að hella sér út í námið og svitna ögn. Fjalar og & biðja að heilsa litla bró og &.

   Þar til næst.

  

Gleymska.

   Það er nú svo að þó mér finnist allt tíðindalaust þá er alltaf eitthvað sem gleymist. Sama gegnir kveðjur sem mig langar til að senda, þær vilja einnig gleymast.

   Ég vil senda mínar bestu kveðjur til Dúddu frá Hömrum, konu sem búsett var í San Fransisco þegar ég var skiftinemi rétt fyrir sunnan borgina,og reyndist mér eins og besta móðir ( stóra systir ) . Það segir sig sjálft þegar átján ára piltur úr sveit á Íslandi skreppur út í þann stóra heim þá er hjartað stundum lítið. Hafðu þökk fyrir allt. Ef þú lest þetta Dúdda endilega sendu mér símanúmerið þitt. Ég er loksins kominn heim til föðurlandsins eftir margra ára fjarveru og nú ætla ég að reyna að skjóta rótum. Sosum kominn tími til.

   Þar til næst.

Grundarfjarðardagarnir

   Grundarfjarðardagarnir liðu í blíðskaparveðri eins og endranær þrátt fyrir rigningarspá. Svo einkennilegt sem það kann að virðast þá hafa veðurguðirnir verið okkur einstaklega hliðhollir í gegnum árin, þrátt fyrir rigningarspá!

   Óstaðfestar tölur herma að hér hafi verið á milli 4- 5 þúsund manns sem er töluverð fjölgun frá fyrra ári, en þar sem allt fór einstaklega vel fram þá varð maður varla var við þessa miklu fjölgun, enda var vel að öllu staðið. Grundfirðingar brettu aldeilis upp ermarnar og þrifu og máluðu jafnvel girðingar ( steinveggi ) sem aldrei verið málaðar fyrr þannig að bærinn skartaði sínu fegursta fyrir utan náttúrlega grænu umferðareyjarnar sem nú minna helst á Sahara eyðimörkina. En svona er nú það.

   Það var einstaklega ánægjuleg tilfinning að rölta um bæinn og rekast á skólasystkin sem ég hef ekki séð árum ( áratugum ) saman og ofan á allt þá fékk ég kærkomna heimsókn frá Færeyjum!

   Það virkar hálf tómlegt hérna núna eftir þessa frábæru helgi en þetta er nú lífið. Búið er að endurýja sumarbústaðinn að mestu, nýjir gluggar og ný útihurð þannig að þetta er allt á réttri leið. Ég slæ botninn í þetta að þessu sinni, maður hálf innantómur beint nú.

   Þar til næst.

Daglegt líf.

   Oft vill verða svo að þegar ég sest við tölvuna þá er eins og allt frjósi. Mér finnst eins og hér gerist ekki neitt sem er helber misskilningur, það er bara að fylgjast betur með.

   Reyndar bárust mér þau tíðindi hér fyrr í dag að nágranni litla bró ( búsettur að Grundarg.41) væri búinn að selja, konan hefur hafið störf á Rvk. svæðinu og bóndinn flytur suður í haust.

Það verður að segjast eins og er að það er missir að fólki sem hefur verið búsett hér árum saman en "sådan er livet". Ég skrapp í sund ( buslaði ) og virti fyrir mér framkvæmdirnar í leiðinni, allt hverfið  verður fallegra og snyrtilegra með hverjum deginum!

   Framkvæmdum við nýju bryggjuna er að ljúka og hér komu tvö skemmtiferðaskip með dags millibili í blíðskaparveðri og óvenju hljótt yfir öllu. Kannski vegna þess að ég hafði vit á að halda mig fjarri.

   Hver veit?

   Hef verið að dútla með málningarpensil frammi í sveit og þar hitti ég æskuvinkonu mína sem ég hef ekki séð árum saman. Það voru einstaklega ánægjulegir endurfundir.

   Ég ætla að slá botninn í þetta að sinni, bið kærlega að heilsa litla bró og fjölskyldu í Álaborg og einnig Hrönn Harðardóttur ( frá Hömrum ) Ásamt fjölskyldu í Árósum.

   Alveg er það frábært hversu góðum árangri er hægt að ná með tveim fingrum á lyklaborðið. Gef sjálfum mér herðaklapp.

   Þar til næst.