Í sárri neyð...

...er oftar en ekki gripið til löngu úreltra uppskrifta úr kokkabókum "útrásarvíkinganna" sem, í ljósi þess sem á undan er gengið, falla engan veginn að smekk landans.

Nýjasta dæmið eru viðbrögð Jóns Ásgeirs Jóhannessonar vegna fréttar Rúv. í kvöld þar sem fram kemur eitt og annað athyglisvert í tengslum hans við bresku Iceland verslunarkeðjuna.

Þar er talað um markaðsmisnotkun sem jafnvel hefur staðið árum saman.

Of langt mál yrði að telja upp þær málsbætur sem Jón Ásgeir reynir að nota sér til framdráttar en eitt er þó ljóst að það duga engir stjörnulögfræðingar þegar málin eru komin inn á borð sérstaks saksóknara.

Sem vekur upp þá spurningu, hvaðan í fj....... fær drengurinn aura til að borga lögfræðinga hernum sem hann hefur á bak við sig?

Það er jú búið að frysta eignir hans.

Ég fæ stundum framan í mig að ég sé bæði einstaklega illa innrættur og með sóðakjaft og er þá oftar en ekki vitnað í bloggfærslurnar mínar.

Ég kannast við hvorugt en hins vegar viðurkenni ég fúslega að þegar ég sé svínaríið allstaðar í kringum mig þar sem menn rokka enn feitt á kostnað okkar óbreyttra og það á sama tíma og verið er að klípa af lífeyrinum mínum jafnt og þétt, þá sárnar mér.

Nóg er að sinni og þar til næst.

 

 

 

 

Ég fékk þessa frábæru hugmynd.

Í fréttinni af sölu sendiherrabústaðar í London er talað um gróða sem nemur hátt í milljarð. Svo er keyptur bústaður sem, ásamt viðgerðum kostar litlar 870 milljónir.

Var ekki hægt að draga seglin ögn meira saman?

Í stað þess að púkka upp á embætti sem að mínu mati ætti að leggja niður þá mætti minnka niðurskurðinn hjá heilbrigðisþjónustunni, og í framhaldi af því, svo ég viðri nú gamlar hugmyndir, þá á hiklaust að leggja niður sendiráðin á öllum Norðurlöndum utan kannski það danska og virkja ræðismannsskrifstofur mun meira.

Við lokum öllu heila klabbinu.

Það er hins vegar þetta með "2007" flottræfilsháttinn hjá landanum. Við höfum ekki efni á að halda úti sendiráðum út um allar trissur svo af hverju taka stjórnarliðar sig ekki saman og loka?

Hvað er í vegi?

Það læðist að mér sá ljóti grunur að þarna sé verið að stugga við einhverri "heilagri belju." Þeir eru alltof margir sem eru á ríkisspenanum en hvergi virðist mega skera!

Á sama tíma og niðurskurðarhnífurinn er á fullu þá eru bankarnir að hygla vinum og vandamönnum, afskriftir hér og afskriftir þar.

Átti ekki að koma í veg fyrir kennitöluflakkið eða má kannski ekki hrófla við neinu þar?

Nú berst ríkisstjórnin vonlausri baráttu við að leysa skuldavanda heimilinna og talað er um flatan niðurskurð sem að mínu mati er gjörsamlega út úr kortinu því "þeir ríku verða ríkari og þeir fátæku verða fátækari."

Athyglisvert var það sem kom fram í máli forsætisráðherra fyrir nokkrum dögum þar sem í ljós kom að af þeim ca. 22 þúsundum sem eru í vanskilum í dag, voru liðlega 16 þúsund í vanskilum fyrir hrun.

Ég sé enga ástæðu til að púkka upp á þann mannskap. Nógu kostnaðarsamar verða hjálparaðgerðirnar samt.

Nóg að sinni og þar til næst.

 

 

 

 

900 milljóna gróði af sölu sendiherrabústaðar

Lúsarupphæð.

Það er greinilegt, á öllu sem á undan er gengið, að stjórnarliða skortir kunnáttu til að reikna dæmið til enda.

Hver skyldi kostnaðurinn verða ef allir þeir húseigendur sem hafðir voru að ginningarfíflum af bankastarfsmönnum í "góðærinu" lenda nú á vergangi og margir hverjir orðnir atvinnulausir, svo ekki sé minnst á þá sem jafnvel þurfa að leita sér félagslegrar aðstoðar?

Hver skyldi svo rekstrakostnaðurinn verða af íbúðum sem koma til með að standa tómar?

Húshitunarkostnaður kostar sitt og enginn verður til að borga því kaupendur finnast ekki nema þá helst að einhverjir "afskriftargreifar" sjái sér leik á borði og byrji að hamstra.

Hér er um að ræða upphæð sem er bara brot af þeim afskriftum sem vildarvinir bankanna hafa notið.

Íslenska ríkið þurfti að gefa bönkunum innspýtingu upp á hundruðir milljarða svo allt færi nú ekki til fjandans.

"Skinney-Þinganes, Bjarni Ármannsson, Baugsveldið, Pálmi Fons........"

Af nógu er að taka en ríkisstjórnin kveinkar sér yfir þessari smánarupphæð.

Skilaboðin að "westan" eru skýr. AGS leyfir ekki frekari aðstoð við þá sem komnir eru í þrot. Nú, tveimur árum eftir hrun eru allar aðgerðir ríkisstjórnarinnar svo hikandi og fálmkenndar að minnir helst á ungann sem er að feta fyrstu fótsporin.

Það veldur mér sárum vonbrigðum því meðal stjórnarliða já og stjórnarandstöðu er hópur ungs og efnilegs fólks með góðar úrlausnir og umfram allt vilja og getu til að takast á við vandann.  Ég minnist "lyklafrumvarps" Lilju Mósesdóttur sem illu heilli var þaggað niður og það af samstarfsfólki hennar.

Eftir að hafa fylgst með þættinum "Návígi" fyrir skömmu síðan þar sem hún lagði spilin á borðið og lýsti stöðunni eins og hún er kom mér helst í hug "goggunarröðin" þar sem haninn í hópnum (geti hver fyrir sig) leggur drögin að því hvenær hver hæna megi verpa(lesist: hafa frumkvæði).

Ég tek undir orð Lilju að nú sé kominn tími til kosninga. Að vísu hefði ég kosið að sjá allt landið sem eitt kjördæmi í það minnsta að vægi atkvæða yrði jafnt.

Það er reyndar til lítils að boða til kosninga ef engin verður endurnýjunin á þeim sem í framboð fara. Svo ég gefi nú smá kredit þá verð ég að segja Bjarna Ben. til hróss að mér finnst hann hafa tekið geysilegum framförum. Drengurinn er greinilega að þroskast en það er ekki þar með sagt að ég styðji hann. Það er svo önnur saga.

Ég vona að þessar hugleiðingar mínar veki einhvern til umhugsunar og þar til næst.

 

Aðgerðirnar kosta 200 milljarða

Af arðgreiðslum,afskriftum og niðurskurði.

Þessa dagana dynja á okkur fréttir af niðurskurði hér og niðurskurði þar. Öll gerum við okkur grein fyrir nauðsyn þess, það þarf jú að skafa upp skítinn eftir "útrásarvíkingana" og samkvæmt íslensku hefðinni lendir tiltektin á þeim sem minnst mega sín.

Mér blöskrar þó hversu harkalega er ráðist að heilbrigðiskerfinu. Fæðingarorlof skorið niður. Barnabætur skornar niður. Í framhaldi af því kæmi mér ekki á óvart að sett yrðu lög sem bönnuðu fólki að eignast börn á meðan kreppan ríkir. Það væri alveg í anda fálmkenndra aðgerða núverandi ríkisstjórnar.

ESB bullið kostar jú sitt.

Á sama tíma og verið er að tálga síðustu kjöttægjurnar af óbreyttum almúganum berast oss fréttir af milljóna og jafnvel milljarða afskriftum hjá hinum og þessum (sjávarútvegs)fyrirtækjum.

Mér er í ríku minni þegar Bjarni nokkur Ármannsson kom heim frá Noregi, grét krókódílstárum, "endurgreiddi" hluta af þeim milljónum sem honum hafði tekist að sölsa undir sig, og lofaði að skikka sér pent.

Hverjar urðu svo efndirnar?

Enn er afskrifað og nú eru það 800 milljónir króna sem strákskömmin hefur fengið felldar  niður.

Hér kemur athyglisverð klausa.

"Ársreikningur eignarhaldsfélags í eigu Bjarna Ármannssonar fjárfestis, Imagine Investments, fyrir árið 2009 staðfestir um 800 milljóna króna niðurfærslu á skuldum félagsins á árinu. Reikningnum var skilað til ársreikningaskrár ríkisskattstjóra í september.

Félagið er dótturfélag eignarhaldsfélags í eigu Bjarna sem heitir Sjávarsýn. Á sama tíma og skuldir Imagine Investments voru afskrifaðar tók Bjarni sér tæplega 400 milljóna króna arð út úr Sjávarsýn, líkt og DV greindi frá á mánudaginn."

Skilanefnd Glitnis gat leyst félagið til sín, sett það í þrot eða fengið einhverjar krónur upp í skuldina gegn afskriftum.

Það er orðið hverjum deginum ljósara að hér hefur ekkert breyst frá því fyrir hrun.

Stjórnarliðar eru orðnir svo samdauna spillingunni og óþverranum sem hér grasserar, aldrei sem fyrr, að þau sjá ekki lengur fram fyrir nefið á sér.

Það þarf að hreinsa til innan bankakerfisins og það hið fyrsta. Það er að vísu fáránleg bjartsýni af mér að halda að slíkt verði gert en ólgan í þjóðfélaginu vex og er komin að suðupunkti.

Ég hræðist þá stund þegar upp úr sýður.

Þar til næst.

 

 

Á hvaða forsendum?

Rökin sem stjórnendur Íslandsbanka færa fyrir því að neita að afhenda eftirlitsnefnd um sértæka skuldaaðlögun þær upplýsingar sem farið var fram á lýsa þvílíkum hroka og mannfyrirlitningu að ég fæ ekki orða bundist.

Halda fj...... apakettirnir sig vera hafna yfir lög og rétt?

Er verið að fela eitthvað?

Hvar er gagnsæið?

Er fjármálakerfið farið að stjórna landinu?

Það er bölvuð ólykt af þessu öllu. Löngu tímabært að svipta svona fyrirtæki starfsleyfi og mætti þá kanna, svona í leiðinni, hvað yfirmennirnir hafa skammtað sér í laun. Það er örugglega ögn meira en það sem þeir ólánssömu íbúar þessa lands verða að láta sér nægja og geta ekki einu sinni flúið landið, annahvort vegna örorku eða aldurs.

Hvað með erlent lán Birnu bankastjóra? Var samið um afborganir eða var lánið afskrifað?

Á sama tíma og það vesalings hrekklausa og auðtrúa fólk sem lét ginnast af gylliboðum bankanna  er borið út á götuna þá hala bankarnir inn upphæðir sem að sjálfsögðu falla í kramið hjá núverandi stjórn landsins, þ. e. AGS, og fyrrverandi eigendur og stjórnendur gömlu bankanna rokka feitt í útlöndum og dafna eins og púkinn á fjósbitanum hjá Sæmundi fróða.

Nú er kominn tími á tiltekt.

Mér blöskrar þegar ég heyri hjáróma jarm bankastjóranna í dag þar sem þeir fara mikinn og tala um batnandi stöðu bankanna, en á kostnað hvers?

Yfirveðsettar íbúðir eru hrifsaðar af fólkinu sem hefur það eitt til saka unnið að hafa látið ginnast af fölskum loforðum bankastarfsmanna, og verður að láta sér nægja stofugólfið hjá vinafólkinu, þ. e. þeim sem enn eiga þak yfir höfuðið, eða tjaldstæði í Laugardalnum.

Það er löngu nóg komið.

Það kom berlega í ljós við setningu Alþingis að "búsáhaldabyltingin" var eingöngu smekkur af því sem koma skal. Núverandi ríkisstjórn er búin að gera upp á axlir enda engin furða því forgangsröðunin sneri sig um að eyða tíma og ómældu fjármagni í að troða okkur inn í ESB og svo kom stjórnlagaþingið sem er einn skrípaleikurinn ofan á annan. 

Kallast þetta ekki að kasta krónunni fyrir aurinn?

Áfram siglir ríkisstjórnin fyrir fullum seglum en nú án lóðsins og treystir á Guð og lukkuna og vonar að ekki steyti á skeri.

Ég er búinn að fá upp í kok!

Þar til næst.

 

 

 

 

Neitaði eftirlitsnefnd um upplýsingar

Gráttu Hreiðar, gráttu nú.

Auðvitað er drengurinn saklaus.

Blásaklaus!

Hvað skyldi ég hafa fyrir mér í því? Jú, og þetta er hvorki rökvilla né rökbrella,hann segir það sjálfur.

Það var ekki honum að kenna að hann var skikkaður á ofurlaun.

Það var ekki honum að kenna að hann var forstjóri Kaupþings.

Það var ekki á hans könnu að axla ábyrgð á einhverjum fíflalegum ákvörðunum og rekstrar-    fyrirkomulagi bankans. Til hvers hefur maður undirmenn?

Þú meinar... já auðvitað. Hann sem vesæll forstjóri bar bara ábyrgð á að borga sér lúsarlaunin mánaðarlega.

En hvað með sekt? Áttu við? Nú að sjálfsögðu. Saklaus uns brot er fyrnt.

Blásaklaus! Það sögðu reyndar sakleysingjarnir von Ribbentrop, Wilhelm Keitel, Ernst Kaltenbrunner, Alfred Rosenberg, Hans Frank, Julius Streicher, Fritz Sauchel, Alfred Jodl og Arthur Seyss-Inquart þ.16. okt.1946. Samt voru bandamenn svo grófir að draga þá að húni rétt eins og um fána væri að ræða þrátt fyrir þá staðreynd að þeir höfðu einungis fylgt skipunum yfirmanna sinna.

Áttu við...já auðvitað...þeir sögðu það sjálfir.

Þarna komum við ögn inn á siðferði , já og viðskiptasiðferði, en hvorugt virðist finnast í hinu íslenska yfirmannasamfélagi.

"Ég var bara forstjóri."

Mig er farið að lengja eftir aðgerðum sérstaks saksóknara.

Þar til næst.

 

 

 

Segist ekki hafa brotið lög

Góðir hlutir gætu gerst.

Nú er okkur tjáð að lækka skuli vörugjald á ákveðnar tegundir ávaxtaþykknis og það er af hinu góða. Í framhaldi af því fyndist mér ofur eðlilegt að verslunareigendur, sem í dag bjóða ungunum okkar 50% laugardagsafslátt af sælgæti og stuðla þar með að auknum tannskemmdum svo ekki sé minnst á grenjið og gólið sem oft vill fylgja ef vesalings foreldrinu verður á að segja nei við krílið sitt, sæju sóma sinn í að færa afsláttinn yfir á ávexti og grænmeti.

Gæti líka sparað foreldrum andvökunætur þegar þeir kumpánar Karíus og Baktus fara að herja á viðkvæman tannglerung barnanna.

Nú er verið að "íhuga" (takið eftir orðinu) skatt á fjármálaþjónustu hérlendis og þá horft á útfærslu Breta í þeim málum.

Hugmyndin sem slík er góðra gjalda verð en gæti reynst illframkvæmanleg.

Í fyrsta lagi er löngu tímabært að herða þumalskrúfurnar á fyrrverandi stjórnendum og eigendum fjármálastofnana, sem í dag keppast við að lýsa yfir sakleysi sínu fyrir dómstólum erlendis á reiprennandi íslensku því enskukunnáttan er jú löngu fokin út í veður og vind.

Einhverjir ku vera orðnir auralitlir og verða að láta sér nægja að sulla í sig diet coke og Coop tekexi.

Stjörnulögfræðingar kosta jú sitt.

Þar sem biðlisti væntanlegra gesta hins opinbera lengist jafnt og þétt, þrátt fyrir útboð fimmtíu rúma (einkaherbergja?) öryggisfangelsis vil ég enn og aftur viðra hugmynd mína um gapastokka og gaddavírssvipur á Lækjartorgi.

Í öðru og mun alvarlegra lagi má búast við, samkvæmt íslenskri hefð, að áðurnefndum skatti yrði velt yfir á löngu sligaðar axlir skattgreiðenda þessa lands, þ. e. aldraðra, öryrkja og óbreyttra launþega.

Þau eru mörg ljónin í veginum og með þeim orðum kveð ég ykkur og þar til næst.

Launaleiðrétting?

Ég get ekki orða bundist.

Einar bjálfinn Örn hamrar á þessari útjöskuðu tuggu að launahækkun varaborgarfulltrúa sé leiðrétting á launum.

Hvað með liðið sem stendur í biðröð fyrir utan hjálparstofnarirnar til þess eins að fá mat oní gogginn á börnunum sínum?

Hvað með liðið sem nú líður fyrir afglöp fyrrverandi eigenda og stjórnenda gömlu bankanna?

Hvað líður störfum sérstaks saksóknara?

Hver er réttlæting Gnarristanna fyrir launahækkun (leiðréttingu) sinna manna á sama tíma og tillaga um "leiðréttingu" þeirra sem virkilega þurfa á hjálp að halda er felld?

Í morgun réðust Gnarristar á forseta og utanríkisráðherra Slóvakíu og báru þeim á brýn kynþáttamisrétti. Vissulega var ástæða til en það gleymdist að geta þeirra íslensku barna sem enn þann dag í dag búa við misrétti þó af öðru tagi sé. Þar fyrir utan er viðbjóðurinn að koma upp á yfirborðið, sona smátt og smátt.

Eitt mega þeir Gnarristar eiga, þeir lofuðu því að spillingin yrði á yfirborðinu, ekkert yrði falið.

Þeir hafa svo sannarlega staðið við gefin loforð.

Eygló Harðardóttir rífur kjaft og blammerar forsætisráðherra fyrir að standa við sína meiningu.

Hvenær skyldi nú sirkusnum ljúka?

Ég velti þeirri spurningu oft fyrir mér. Kannski fæ ég einhvern tímann svar.

Þar til næst.

 

 

 

"Nóg er nú komið samt"

 

Nú á að fara að taka til innan stjórnsýslunnar og sosum kominn tími til. Hinsvegar, eins og svo oft áður, finnst mér byrjað á öfugum enda.

Nú á að draga nokkra fyrrverandi ráðherra fyrir Landsdóm sem að mínu mati er jafn úreltur og spænski rannsóknarrétturinn. Þar get ég tekið undir með forsætisráðherra að löngu hefði verið tímabært að leggja hann niður og  láta málið fara fyrir venjulega dómstóla þar sem menn hlytu þó réttarstöðu grunaðra í stað þess að standa frammi fyrir 105 ára gömlu fyrirbæri sem reyndar var orðið úrelt strax árið 1960 en þá þótti ástæða til að bursta rykið af.

Mikið vatn hefur runnið til sjávar síðan þá.

Nú einblína menn á væntanlega sök eða vanrækslu fyrrverandi ráðherra í aðdraganda hrunsins en hvergi er minnst á aðkomu fyrrverandi eigenda og stjórnenda bankanna sem samkvæmt "rannsóknarskýrslunni" blóðmjólkuðu bankana innan frá.

Hvað líður störfum sérstaks saksóknara?

Svo ég snúi mér nú að öðru þá ber efst á baugi þessa dagana endurkoma Þorgerðar Katrínar á þing og sýnist þar sitt hverjum.

Þó svo skoðanir okkar fari ekki alltaf saman þá ber ég virðingu fyrir henni og þá ekki síst fyrir þá ákvörðun hennar að stíga til hliðar á meðan "rannsóknin mikla" stóð yfir. Hún var sú eina sem hafði þann manndóm til að bera en margir aðrir hefðu átt að sýna sóma sinn í því að fylgja fordæmi hennar.

En það er nú bara þetta "ekki benda" á mig heilkennið.

Og enn að öðru.

Nú virðist grassera áður óþekktur sjúkdómur sem herjar helst á "útrásarvíkinga" og lýsir sér í minnisleysi áðurnefndra og þá sérstaklega þegar um er að ræða enskukunnáttu. Þrátt fyrir háskólanám, ásamt tilheyrandi gráðum, vestan hafs og austan.

Ekki fer sögum af smithættu en allur er varinn góður, þ. e. okkur óbreyttum ber þá að forðast "útrásarvíkinga" en það er þetta með háskólanámið.  ?

Kveð að sinni, þarf að ljúka enskuverkefninu og þar til næst.

 

Guð gefi að svo verði.

Burtséð frá því að ég er gallharður andstæðingur aðildar Íslands að Evrópusambandinu þá yrði ómakið tekið af okkur því ekki þyrfti að efna til þjóðaratkvæðagreiðslu um málið þar sem umsóknin yrði kolfelld hvort eð er.

Einnig myndu sparast einhverjar krónur líka sem, nota bene, ekki eru til.

Nema þá helst hjá hinni nýju yfirstétt landans þ. e. bankastarfsmönnum.

Ég rak augun í mjög svo athyglisverða frétt í mbl. áðan þar sem greinarhöfundur fer mikinn og fjallar um hugsanlega ábyrgð fyrrverandi ráðherra í ríkisstjórn Sjálfstæðisflokksins og Samfylkingar ef Alþingi gæfi út ákæru á hendur fjórum fyrrverandi ráðherrum í ríkisstjórn Geirs. H. Haarde, eins og flest stefnir nú í.

Samkvæmt fréttinni þá virðist þingheimur og þá sérstaklega þingmenn og ráðherrar úr röðum Samfylkingar gjörsamlega vera að fara á límingunum.

En hvað með sjallana?

Orðaskipti þingmanna okkar undanfarna daga hafa, þrátt fyrir hefðbundna niðurrifsstarfsemi, veitt mér ómælda ánægju.

Málfarið hefur augljóslega færst frá grunnskólastílnum yfir í "aþþíbara" stílinn. Ég legg til að útvarpsráð samþykki nú að hefja fastar sendingar frá Alþingi. Það myndi vega upp á móti sárum niðurskurði og svo mætti spara enn meira með því að henda út einhverjum af þessum eilífðar bandarísku sápuóperum og koma með eina íslenska.

Ný þyrfti einhver tölvusnillingurinn að stofna Facebook síðu þar sem við gætum skorað á Rúv. að auka íslenska framleiðslu og með þessum orðum kveð ég nú og þar til næst.

 

 

 

 

Sögð geta hindrað ESB-aðild